Նոան չհաղթեց Չեռնոգորիայում, բայց դուրս եկավ ՉԼ-ի որակավորման 2-րդ փուլ (տեսանյութ)

Չեմպիոնների լիգայի որակավորման 1-ին փուլի պատասխան խաղում «Նոան» հյուրընկալվել էր «Բուդուչնոստին»։ Հանդիպումն ավարտվեց 2։2 հաշվով։

6-րդ րոպեին Իմրան Ուլադ Օմարը բացեց հանդիպման հաշիվը։ Տեսանյութը՝ այստեղ։

18-րդ րոպեին Իվան Բուլատովիչը ստացավ 2-րդ դեղին քարտն ու «Բուդուչնոստին» թողեց 10 հոգով։ 29-րդ րոպեին Ալեն Գրգիչը մեծացրեց «Նոայի» առավելությունը՝ խփելով Հայաստանի չեմպիոնի կազմում իր առաջին գոլը։ Տեսանյութը՝ այստեղ։

68-րդ րոպեին Իգոր Իվանովիչը կրճատեց հաշվի տարբերությունը։ Հիմնական ժամանակի ավարտից 1 րոպե առաջ Մաթեյուս Այասը վաստակեց 11-մետրանոց, սակայն չկարողացավ իրացնել այն։ Դրանից րոպեներ անց Պետար Գրբիչը վերականգնեց հաշվի հավասարությունը, բայց ավելին անել չեռնոգորական թիմին չհաջողվեց։

Դիմակայության 1-ին խաղում նվազագույն հաշվով հաղթանակի շնորհիվ «Նոան» դուրս եկավ Չեմպիոնների լիգայի որակավորման 2-րդ փուլ, որտեղ կմրցի Հունգարիայի չեմպիոն «Ֆերենցվարոշի» հետ։

Այսպիսով, «Նոան» նվազագույնն ապահովում է իր ներկայությունը Կոնֆերենցիաների լիգայի փլեյ-օֆֆում։