Ռոբերտ Արզումանյան. Հուսով եմ՝ միտում չկա, բայց պատահականություններին չեմ հավատում
«Ուրարտուի» գլխավոր մարզիչ Ռոբերտ Արզումանյանը Fastex Պրեմիեր լիգայի 21-րդ տուրի՝ «Վանի» դեմ արտագնա հաղթանակից հետո կարծիք է հայտնել խաղի մասին.
««Վանը» շատ վտանգավոր ու մրցունակ թիմ է, որը հավաքել է բավականին շատ միավորներ: Նախորդ երկու խաղերում չի պարտվել «Արարատ-Արմենիային» և հաղթել է «Արարատին»: Մենք խաղում էինք լավ թիմի դեմ. ունեցանք խաղային խնդիրներ, չիրագործեցինք մեր խաղային նպատակները, բայց ստեղծեցինք շատ գոլային պահեր և արժանիորեն հաղթեցինք:
Ես մի քանի տուր առաջ խոսել եմ մի երևույթի մասին, որից վտանգ եմ տեսնում: Դա առաջնության վերջին խաղերի թեժ պայքարում մրցավարական (հուսով եմ՝ ոչ միտումնավոր) սխալներն են: Այսօր մրցակցի օգտին անհիմն տուգանայիններ էին նշանակվում: Ժիրայր Մարգարյանին դեղին քարտ ցուցադրվեց մի դրվագում, որը համարվեց հեռանկարային գրոհի խափանում: Ես, այսքան տարի ֆուտբոլում լինելով, չեմ տեսել, որ մրցակցի տուգանային հրապարակի գծի մոտ խախտումը մրցավարը բացատրի որպես հեռանկարային գրոհի ընդհատում:
Մինչև վերջ հուսով եմ՝ ոչ մի միտում չկա: Բայց պատահականություններին չեմ հավատում»:
