ՈւԵՖԱ-ն հետաքննություն է սկսել Բավարիայի դեմ. ՉԼ-ի կիսաեզրափակիչը կարող է անցնել առանց հանդիսականների
ՈւԵՖԱ-ն կարող է կարգապահական պատժամիջոցներ կիրառել «Բավարիայի» դեմ՝ Չեմպիոնների լիգայի քառորդ եզրափակչի «Ռեալի» դեմ տնային հանդիպումից հետո (4:3):
Sky Sport-ի փոխանցմամբ՝ ՈւԵՖԱ-ն հետաքննություն է սկսել ակումբի նկատմամբ՝ չորեքշաբթի երեկոյան երկրպագուների մասնակցությամբ տեղի ունեցած միջադեպերի մասով, սակայն ՈՒԵՖԱ-ն հավելյալ մանրամասներ չի հայտնել։
Հաղորդվում է, որ հանդիպման վերջնամասում «Բավարիայի» որոշ երկրպագուներ անցել են պատնեշների վրայով և մոտեցել խաղադաշտին։ Այն բանից հետո, երբ տանտերերը մրցավարի ավելացրած ժամանակում խփել են հաղթական գոլը, նրանք սկսել են տոնել և հրմշտել գովազդային վահանակների հետևում նստած լուսանկարիչներին։ «Բավարիայի» խաղացող Ջամալ Մուսիալան իր հերթին ցատկել է հանդիսականների ամբոխի մեջ՝ արդյունքում հարվածելով մի քանի լրագրողի։
Ոստիկանության տվյալներով՝ միջադեպի հետևանքով տուժել է առնվազն չորս մարդ։ Հետաքննությունն իրականացնում է Մյունխենի քրեական ոստիկանությունը։
ՈՒԵՖԱ-ի հայտարարությունից պարզ չի դառնում՝ արդյո՞ք «Բավարիայի» երկրպագուներին սպառնում է հանդիպումներին ներկա գտնվելու արգելք, մասնավորապես՝ մայիսի 6-ին կայանալիք ՊՍԺ-ի դեմ Չեմպիոնների լիգայի կիսաեզրափակիչ պատասխան խաղին։ Հրատեխնիկայի կիրառմամբ բազմաթիվ միջադեպերից հետո 2025 թվականի դեկտեմբերին մյունխենցիների երկրպագուներին արգելվել էր մուտքը մարզադաշտի հարավային տրիբունա։ Ավելի ուշ այդ պատիժը կասեցվել էր ՈՒԵՖԱ-ի Կարգապահական և էթիկայի մարմնի կողմից՝ փորձաշրջանով։
