Ռիկարդո Դիոնիսիո. Ֆուտբոլիստներին ասացի՝ Աստված մեզ հնարավորություն է տվել, և պետք է օգտագործել այն

Fastex Պրեմիեր լիգայի 24-րդ տուրի «Շիրակ»-«Արարատ» (0:2) խաղից հետո երևանցիների գլխավոր մարզիչ Ռիկարդո Դիոնիսիոն բացատրեց, թե ինչի շնորհիվ հաջողվեց հաղթանակի հասնել Գյումրիում:

«Այո՛, նախորդ տուրում «Շիրակը» «Գանձասարի» դեմ խաղում 2:0 հաշվով առջևում էր և պարտվեց՝ 2:3, սակայն այդ խաղը մեզ նախապատրաստվելու առումով ոչինչ չտվեց: Այդուհանդերձ, ես հիմար չեմ և հասկանում եմ, որ այդ խաղի արդյունքը նպաստեց նրան, որ այսօրվա հանդիպումից առաջ լիներ ընդամենը 3 միավորի տարբերություն: Ֆուտբոլիստներին ասացի՝ Աստված մեզ հնարավորություն է տվել, և պետք է օգտագործել այն:

Շնորհավորում եմ իմ ֆուտբոլիստներին՝ ցուցադրած խաղի ու նվիրվածության համար: Հիմա մենք թիմի ներսում այլ պատկեր ենք տեսնում, քան երբ 4 ամիս առաջ նոր էինք եկել ակումբ: «Արարատն» ունի բարձր որակի ֆուտբոլիստներ, որոնք նաև լավ խաղ են ցուցադրում: Հիմա մենք միասնական ենք. միասին ենք հաղթում ու պարտվում»,- ասաց պորտուգալացին:

Ամբողջական ասուլիսը