Հասել ենք մեր նվազագույն նպատակին. Մանուել Տուլիպան՝ եվրագավաթային մրցաշարի հիմնական փուլում տեղն ապահովելու մասին

«Արարատ-Արմենիայի» գլխավոր մարզիչ Մանուել Տուլիպան խոսել է ակումբի առջև դրված նվազագույն նպատակի ու «Շեմրոկ Ռովերսի» նկատմամբ երկխաղյա դիմակայությունում տոնած հաղթանակի մասին։

Հայաստանի չեմպիոնը երկխաղյա դիմակայությունում տարած 3:2 հաշվով հաղթանակի շնորհիվ դուրս է եկել  Չեմպիոնների լիգայի որակավորման երրորդ փուլ և ապահովել իր տեղը առնվազն Կոնֆերենցիաների լիգայի Լիգայի փուլում:

«Կարծում եմ՝ երկու տարբեր խաղակեսեր էին: Առաջին կեսում մրցակիցը շատ լավ ֆուտբոլ խաղաց, իսկ երկրորդ կեսում մենք փոխեցինք խաղային սխեման, սկսեցինք ավելի շատ վերահսկել գնդակն ու փոխեցինք խաղի տեմպը, ինչի շնորհիվ գոլ խփեցինք ու ապահովեցինք մեր տեղը հաջորդ փուլում: Մենք զարգացող ակումբ ենք ու մեզ համար շատ կարևոր էր այս արդյունքին հասնելը: Մեր առջև նպատակ էինք դրել որակավորվել որևէ եվրագավաթային մրցաշարի խմբային փուլին, և այդ նպատակին արդեն հասել ենք: Սա շատ կարևոր էր մեզ համար», - ասել է Տուլիպան:

Հիշենենք՝ «Արարատ-Արմենիան» կլինի հայկական 4-րդ թիմը, որը կմասնակցի Եվրագավաթային մրցաշարի հիմնական փուլի։ Մինչև այս ԿԼ հիմնական փուլին են մասնակցել «Ալաշկերտը», «Փյունիկն» ու «Նոան»։ 

Չեմպիոնների լիգայի որակավորման երրորդ փուլում Հայաստանի չեմպիոնը կմրցի Սլովենիայի «Ցելյեի» հետ։