Հայ գեղասահորդները չեն մասնակցի Եվրոպայի առաջնությանը՝ Մեծ Բրիտանիայի մուտքի արտոնագրի պատճառով
Հայաստանի ազգային հավաքականի գեղասահորդներ Սիմոն Դանիլյանցը և սպորտային զույգ Կարինա Ակոպովա / Նիկիտա Ռախմանին զույգը չեն մասնակցի գեղասահքի Եվրոպայի առաջնությանը: Այս մասին հայտնում է Հայաստանի գեղասահքի ֆեդերացիայի մամուլի քարտուղարությունը:
Հաղորդվում է՝ չնայած բոլոր անհրաժեշտ փաստաթղթերի ժամանակին ներկայացմանը, Մեծ Բրիտանիայի դեսպանատունը մեր մարզիկներին չի տրամադրել մուտքի վիզաները սահմանված ժամկետներում, ինչի արդյունքում մեր հավաքական թիմը զրկվել է Եվրոպայի առաջնությանը մասնակցելու հնարավորությունից։
«Սա լուրջ հարված է մեր մարզիկների ամբողջ սեզոնային պատրաստությանը, մրցակցային զարգացմանը և միջազգային վարկանիշային դիրքերին։ Տարիների քրտնաջան աշխատանքը, պատրաստվածությունն ու նվիրումը չպետք է կախված լինեն վարչական ձգձգումներից։
Հայաստանի գեղասահքի Ֆեդերացիան անում է ամեն ինչ նման իրավիճակների կրկնությունը կանխելու և մեր մարզիկների իրավունքները պաշտպանելու համար»,- ասվում է ֆեդերացիայի տարածած հաղորդագրության մեջ:
