Մեր ուղին նոր է սկսվում․ Միհրան Դերմենջյանը՝ Ուկրաինայի նկատմամբ տոնած հաղթանակից հետո
Ֆուտզալի Եվրոպայի առաջնության B խմբի 1-ին տուրի Հայաստան-Ուկրաինա (2։1) հանդիպումից հետո Հայաստանի ազգային հավաքականի ֆուտզալիստ Միհրան Դերմենջյանը կիսվել է տպավորություններով՝
«Բարդ կլինի նկարագրել էմոցիաներս։ Մինչ այս պահը զգում ենք լարվածություն։ Մեր ուղին նոր է սկսվում։ Մենք շատ երջանիկ ենք, բայց հուսով եմ, որ մեզ դեռ ավելին է սպասվում։ Ֆուտզալի Եվրոպայի առաջնությունում խաղալը երազանք էր։ Ես երազում էի գոլ խփել և դա նույնպես ստացվեց։ Գիտեինք, որ Ուկրաինայի հավաքականը շատ ուժեղ մրցակից է, բայց մենք ունեինք մեր տակտիկան և մենք մինչև վերջ հավատում էինք մեզ»,-նշել է Դերմենջյանը, որի դուբլն էր հաղթանակ պարգևել մեր ընտրանուն։ 28-ամյա ֆուտզալիստը ճանաչվել էր հանդիպման լավագույն խաղացող։
Հայաստանի հավաքականի համար սա 1-ին հանդիպումն ու հաղթանակն էր Եվրոպայի առաջնությունների եզրափակիչ փուլերում։
2-րդ տուրում Հայաստանի հավաքականը կմրցի Չեխիայի, 3-րդ տուրում՝ Լիտվայի հավաքականի հետ։
B խմբի 1-ին տուրի մյուս խաղում Չեխիան ու Լիտվան հաղթողին
չեն պարզել։
Հիշեցնենք, որ ֆուտզալի Հայաստանի ազգային հավաքականը դարձել է Հայաստանի պատմության ընթացքում խաղային որևէ մարզաձև ներկայացնող առաջին հավաքականը, որը հասել է Եվրոպայի առաջնությունների եզրափակիչ փուլ:
