Ոսկե ու արծաթե մեդալներ՝ աշխարհի գավաթի խաղարկությունից

Գերմանիայի Կոտբուս քաղաքում շարունակվում է մարմնամարզության աշխարհի գավաթի խաղարկության 1-ին փուլը։

4 մարզիկով մրցավայր մեկնած Հայաստանի հավաքականն ապահովել է 2 մեդալ։

Նախ օղակներ վարժությունում վաստակելով 14,366 միավոր ու շրջանցելով Ադրբեջանի ներկայացուցիչ Նիկիտա Սիմոնովին (14,000) ու ԱՄՆ-ը ներկայացնող Նելսոն Քամերոնին (13,866)՝ չեմպիոնի կոչմանն արժանացավ Արթուր Ավետիսյանը, իսկ նժույգ թափեր վարժությունում արծաթե մեդալ նվաճեց Մամիկոն Խաչատրյանը։ Վաստակեած 14,966 միավոր հայ մարզիկը զիջեց միայն իտալացի Գաբրիել Տարգետային։

Հայաստանի մյուս ներկայացուցիչ Համլետ Մանուկյանն այս վարժաձևում 7-րդն էր։

Նշենք, որ աշխարհի գավաթի խաղարկության 1-ին փուլին, վնասվածքի պատճառով, չի մասնակցի Արթուր Դավթյանը։

Աշխարհի գավաթի խաղարկության հաջորդ փուլերը կանցկացվեն Բաքվում, Անթալիայում, Կահիրեում, Օսիյեկում ու Դոհայում։