Ուրախ եմ և ոգևորված․ Արդյունքից էլ եմ գոհ․ Եվրոպայի փոխչեմպիոն Էլմիրա Կարապետյան (տեսանյութ)

Երևանում ընթացող հրաձգության Եվրոպայի առաջնության օդամղիչ ատրճանակ կանանց սոլո մրցաձևում արծաթե մեդալակիր դարձած Էլմիրա Կարապետյանը կիսվել է իր տպավորություններով․

«Ուրախ եմ և ոգևորված: Արդյունքից էլ եմ գոհ: Հետաքրքիր մրցակցություն էր: Հունգարիայի ներկայացուցիչը շատ լավ կրակեց: Լարվածություն չկար, պարզապես լավ մրցակցություն էր: Շատ ուրախ և հպարտ եմ, որ Երևանում կարողանում ենք այսպիսի առաջնություն հյուրընկալել: Առաջին անգամ, երբ մտել եմ հրաձգարան, առաջինը հարցրել եմ՝ ինչո՞ւ մենք չեն ընդունում միջազգային մրցաշարեր: Ինձ համար շատ կարևոր էր այս մրցմանը մեդալ նվաճելը»,- նշել է մարզուհին:

Մանրամասն տեսանյութում․

 

Կարապետյանը, հաղթահարելով որակավորման, ապա կիսաեզրափակիչ փուլերը, եզրափակչում մրցել է Հունգարիայի ներկայացուցիչ, Օլիմպիական խաղերի բրոնզե մեդալակիր Վերոնիկա Մայորի հետ և 12:15 հաշվով զիջել մրցակցին՝ բավարարվելով արծաթե մեդալով:

Կարապետյանը դարձել է Եվրոպայի առաջնության կրկնակի փոխչեմպիոն: Նա Եվրոպական խաղերի արծաթե մեդալալիր է, աշխարհի գավաթի խաղարկության կրկնակի ոսկե մեդալակիր։

Այսօր ավելի վաղ, շարժվող թիրախ խառը վազք (տղամարդիկ, կանայք, երիտսարդներ) մրցաձևում կանանց մեծահասակների պայքարում արծաթե մեդալակիր էր դարձել Գոհար Հարությունյանը (370 միավոր):

Տղամարդկանց թիմը` Հովհաննես Մարգարյանը, Հայկ Մինասյանը, Գոռ Խաչատրյանը դարձել էին թիմային պայքարի ոսկե մեդալակիրներ: Կանանց թիմը երկրորդն էր (Գոհար Հարությունյան, Լիլիթ Մկրտչյան, Արուսյակ Գրիգորյան):

Երիտասարդների անհատական պայքարում առաջինը Լիլիթ Մկրտչյանն էր (366 միավոր), իսկ երկրորդը` Յանա Հակոբյանը (362 միավոր):