Ծանրամարտն առաջին անգամ ընդգրկվել է Եվրոպական խաղերի ծրագրում. 2027-ին Խաղերը կկայանան Ստամբուլում

Եվրոպայի օլիմպիական կոմիտեի  (ԵՕԿ) գործկոմը  հաստատել է Ստամբուլում  2027թ.  կայանալիք  Եվրոպական չորրորդ  խաղերի մրցումային ծրագիրը: Այս մասին հայտնում է ՀԱՕԿ-ի պաշտոնական կայքը:

Եվրոպական խաղերում կներկայացվի ընդհանուր առմամբ 26 մարզաձև, այդ թվում՝ Լոս Անջելեսի 2028 թ. Օլիմպիական ծրագրին համապատասխանող 22 մարզաձև։

Թիավարությունը (լողափնյա սպրինտ), ծանրամարտը և սքվոշն առաջին անգամ են ընդգրկվել Եվրոպական խաղերի ծրագրում, իսկ սքվոշն առաջին անգամ կներկայացվի նաև Լոս Անջելես-2028-ում։

Մարմնամարզությունը, վոլեյբոլը և ըմբշամարտը կվերադառնան ծրագիր՝ Կրակով-Մալոպոլսկա 2023-ի խաղերում բացակայելուց հետո։

Մրցավայրերի վերաբերյալ լրացուցիչ մանրամասները կհրապարակվեն առաջիկայում:  

Ծրագրում ընդգրկված են հետևյալ մարզաձևերը՝   3×3 բասկետբոլ, աթլետիկա (Եվրոպայի թիմային առաջնություն), բադմինթոն, բռնցքամարտ, կանոէ, սուսերամարտ, մարմնամարզություն, ձյուդո, կարատե, քիքբոքսինգ, ժամանակակից հնգամարտ, մուայթայ, պադել, թիավարություն (լողափնյա սպրինտ), ռեգբի - 7,  հրաձգություն, սպորտային ժայռամագլցում, սքվոշ, սեղանի թենիս, թհեքվոնդո, եռամարտ, վոլեյբոլ, ծանրամարտ, ըմբշամարտ, նետաձգություն, լող:

Եվրոպական չորրորդ խաղերը կանցկացվեն 2027թ. հունիսի 16-27-ը: