ՖԻՖԱ-ն հեղինակավոր ակումբին արգելել է մինչև 2028 թվականը տրանսֆեր կատարել

Ֆուտբոլի միջազգային ֆեդերացիան որոշել է «Բորդո» ֆուտբոլային ակումբին 1,5 տարով արգելել տրանսֆերներ կատարել։ Ֆրանսիական հեղինակավոր ակումբը չի կարող նորեկներ գրանցել 2026 թվականի ամռանը և ամբողջ 2027 թվականին. տեղեկանում ենք ՖԻՖԱ-ի կայքից։

Այդպիսի որոշման պատճառ է դարձել իսպանական «Սպորտինգ Խիխոն» ակումբի կողմից ՖԻՖԱ ներկայացված հայցը։ Իսպանացիները «Բորդոյից» պահանջում են 1,5 միլիոն եվրո՝ 2023 թվականին կիսապաշտպան Պեդրո Դիասի տրանսֆերի հետ կապված։

Sud Ouest հրատարակության հետ զրույցում «Բորդոյի» իրավաբան Մատյե Բարանդասը հայտարարել է, որ ակումբը բողոքարկելու է այդ որոշումը և հույս ունի՝ մինչև ամառ արգելքը կչեղարկվի։ Ֆրանսիացիները մտադիր են դիմել Մարզական արբիտրաժային դատարան (CAS), իսկ հետո՝ ազգային դատարաններ։

Հիշեցնենք, որ «Բորդոն» Ֆրանսիայի 6-ակի չեմպիոն ու քառակի գավաթակիր է։