Ըմբշամարտի Մ17 ԱԱ. Էրիկ Պապիկյանը սփոփիչ գոտեմարտ կանցկացնի

Ազատ ոճային ըմբիշ Էրիկ Պապիկյանը (65 կգ) Բաքվում ընթացող Մ17 տարեկանների աշխարհի առաջնությունում սփոփիչ գոտեմարտ անցկացնելու իրավունք է ստացել, քանի որ 1/8 եզրափակչում նրան հաղթած ռուս ըմբիշը դուրս է եկել եզրափակիչ:

Պապիկյանը մեկնարկում 9-1 հաշվով հաղթել էր ադրբեջանցի Ռաշիդ Նազարովին ու դուրս եկել 1/8 եզրափակիչ, որտեղ, սակայն, զիջել էր Ռուսաստանի ներկայացուցիչ Մագոմեդ Իհրահիմովին: Վերջինս կիսաեզրափակչում 10-0 հաշվով հաղթել է Պուերտո Ռիկոյի ներկայացուցիչ Ջովանի Սոլիսին և կպայքարի չեմպիոնի կոչման համար:

Սփոփիչ գոտեմարտում հաղթելու դեպքում Էրիկ Պապիկյանը կպայքարի բրոնզե մեդալի համար: