ՀՖՖ կանոնադրության փոփոխություններն ընդունվել են 29 կողմ, 2 դեմ ձայներով

Նոյեմբերի 4-ին Հայաստանի ֆուտբոլի ֆեդերացիայի գլխավոր գրասենյակում կայացել է ՀՖՖ արտահերթ ժողովը։ 34 անդամ ակումբներից արտահերթ ժողովին մասնակցեց 31-ը։

ՀՖՖ պաշտոնական կայքից հաղորդմամբ՝ օրակարգում «Հայաստանի ֆուտբոլի ֆեդերացիա» հասարակական կազմակերպության կանոնադրությունում փոփոխություններ և լրացումներ կատարելու մասին հարցն էր։

Այն ընդունվել է 29 կողմ, 2 դեմ, 0 ձեռնպահ ձայներով։ Դեմ են քվերակել «Արարատ-Արմենիան» և «Ուրարտուն»:

Ավելի վաղ հայտնել էինք, որ ՀՖՖ 29 անդամ ՀՖՖ Արտահերթ ժողով հրավիրելու առաջարկ էր ներկայացրել: Այսպիսով, նոր փոփոխությամբ՝ Գործադիր կոմիտեի անդամի թեկնածու առաջադրվելու համար այլևս չի պահանջվի վերջին մեկ տարում մշտապես բնակվել Հայաստանի Հանրապետությունում և տիրապետել հայերենին։

Մյուս փոփոխությամբ սահմանվում է, որ եթե անձը համապատասխան պաշտոնում փաստացի պաշտոնավարել է երկու տարուց պակաս, ապա այդ ժամանակահատվածը չի հաշվարկվում որպես պաշտոնավարման մեկ ամբողջական ժամկետ, իսկ երկու տարի կամ ավելի պաշտոնավարման դեպքում այն հաշվարկվում է որպես մեկ ամբողջական ժամկետ։