ՀՀ-ում առաջին անգամ կանցկացվի հեծանվահրապարակի երիտասարդների Եվրոպայի առաջնություն
Եվրոպական հեծանվասպորտի ֆեդերացիայի նախագահ Էնրիկո Դելա Կասայի և միության գլխավոր քարտուղար Ալասդեր Մակլենանի՝ ՀՀ կատարած աշխատանքային այցի շրջանակում ձեռք է բերվել նախնական պայմանավորվածություն` ՀՀ-ում անցկացնելու 2029թ. հեծանվահրապարակի երիտասարդների Եվրոպայի առաջնություն և այլ միջազգային մրցաշարեր, ինչպիսին է BMX Freestyle park առաջնությունը:
Այս մասին հայտնում է Հայաստանի հեծանվային սպորտի ֆեդերացիայի մամուլի քարտուղարությունը:
Ֆեդերացիայի նախագահ Արա Սադոյանի հետ հանդիպմանը նաև քննարկվել են Հայաստանում հեծանվային սպորտի զարգացման հարցերը՝ հատուկ ուշադրություն դարձնելով երիտասարդական ծրագրերին և ԵՏՀ-ի կողմից աջակցվող ապագա նախագծերին։
Այցի շրջանակներում, ինչպես ավելի վաղ հայտնել էինք, տեղի է ունեցել հանդիպում ՀՀ վարչապետի աշխատակազմի ղեկավար Արայիկ Հարությունյանի հետ։ Հանդիպմանը ներկա էր նաև ԿԳՄՍ փոխնախարար Հասմիկ Ավագյանը։ Քննարկվել են Հայաստանում հեծանվային սպորտի զարգացման ուղղությամբ իրականացվող աշխատանքներն ու հետագա ծրագրերը:
Արայիկ Հարությունյանը շնորհակալություն է հայտնել մեր երկրում այդ մարզաձևի զարգացմանն աջակցություն ցուցաբերելու համար և ներկայացրել այդ ուղղությամբ ՀՀ Կառավարության կողմից իրականացվող քայլերը: Մասնավորապես նշվել է, որ «ՀՀ վարչապետի գավաթ» խճուղային հեծանվավազքի մրցաշարին ընդառաջ դպրոցներին տրամադրվել են հեծանիվներ:
Էնրիկո Դելա Կասան ևս մեկ անգամ հայտնել է Եվրոպական հեծանվային միության պատրատասկամությունը՝ աջակցություն ցուցաբերելու մեր երկրում հեծանվասպորտի զարգացմանն ու մասսայականացմանը:
