Սարգիս Ստեփանյանը՝ պարա-բազկամարտի Եվրոպայի հնգակի չեմպիոն
Ռումինիայում ավարտված պարա-բազկամարտի Եվրոպայի առաջնությունում Սարգիս Ստեփանյանը նվաճեց չեմպիոնի կոչումը։
Սա դյուցազնագրքում ընդգրկված մարզիկի 5-րդ Եվրոպայի չեմպիոնությունն էր։ Ստեփանյանը նաև Աշխարհի եռակի չեմպիոն ու կրկնակի գավաթակիր է։
Հերթական ոսկե մեդալը նվաճելու կապակցությամբ Ստեփանյանը գրառում է կատարել իր ֆեյսբուքյան էջում․
«Սիրելի հայրենակիցնե՛ր, 2025 թվականի հունիսի 5-ին, Ռումինիայի Քլուժ-Նապոկա քաղաքում կայացած բազկամարտի Եվրոպայի առաջնությունում մինչև 80 կգ քաշային կարգում դարձա Եվրոպայի չեմպիոն։
Սա պարզապես մեդալ չէ։ Յուրաքանչյուր հաղթանակ պատմություն ունի՝ մարզումներ, հաղթահարված ցավ, թիմային աջակցություն ու անձնական պայքար։ Ուրախ եմ, որ կարողացա կրկին պատվով ներկայացնել Հայաստանը միջազգային հարթակում։ Իմ սպորտային ճանապարհը բազկամարտում սկսվել է 2015 թվականից, երբ սկսեցի զբաղվել պրոֆեսիոնալ բազկամարտով։ Այդ ժամանակից ի վեր՝ Եվրոպայի Պարա-բազկամարտի առաջնության հնգակի, Աշխարհի Պարա-բազկամարտի առաջնության եռակի, չեմպիոն և Աշխարհի բազկամարտի կրկնակի գավաթակիր։ Այսօրվա հաղթանակն էլ ևս մեկ քայլ է ապացուցելու, որ հնարավոր է ամեն ինչ։ Շնորհակալ եմ բոլորին աջակցության, հավատքի ու ուժ տվող խոսքերի համար։ Առջևում՝ նոր մարտահրավերներ»։
