Հարգում ենք բոլոր մրցակիցներին. Նոայի գլխավոր մարզիչը՝ ՉԼ վիճակահանության մասին

«Նոայի» գլխավոր մարզիչ Սանդրո Պերկովիչն ակումբի մամուլի ծառայության հետ զրույցում կարծիք է հայտնել ՉԼ որակավորման առաջին փուլի վիճակահանության մասին:

«Մենք հարգում ենք բոլոր մրցակիցներին։ Ծանոթ եմ որակավորման առաջին փուլում մեզ բաժին հասած «Բուդոչնոստի» խաղաոճին։ Այժմ կենտրոնացած ենք մեր մարզումների վրա։ Շարունակում ենք պատրաստվել ամբողջ ուժով և սպասում ենք նոր համալրումների», - նշել է Պերկովիչը։  

Հայաստանի չեմպիոն «Նոան» Չեմպիոնների լիգայի որակավորման առաջին փուլում կմրցի Չեռնոգորիայի չեմպիոն «Բուդուչնոստի» հետ: Այս զույգի հաղթողը ՉԼ որակավորման երկրորդ փուլում կհանդիպի Հունգարիան ներկայացնող «Ֆերենցվարոշի» հետ:

Վիճակահանության արդյունքում պարզ է դարձել, որ «Նոան» ՉԼ որակավորման առաջին փուլում պարտվելու դեպքում Կոնֆերենցիաների լիգայի որակավորման երկրորդ փուլում կխաղա ԿուՊՍ (Ֆինլանդիա)-«Միլսամի» (Մոլդովա) զույգի պարտվողի հետ:

ՉԼ որակավորման 2025/26 խաղարկության առաջին փուլի հանդիպումները նախատեսված են հուլիսի 8-9-ին, իսկ պատասխան խաղերը՝ հուլիսի 15-16-ին: