Ոսկե, արծաթե և բրոնզե մեդալ՝ Տաշքենդում կայացած մարմնամարզության աշխարհի գավաթի խաղարկության փուլում

Հայաստանի  մարմնամարզիկները երեք մեդալ են նվաճել Տաշքենդում կայացած աշխարհի գավաթի խաղարկության փուլում:

Մեր երկիրը ներկայացրած պատվիրակների քառյակը հաջողությամբ հաղթահարել է որակավորման փուլի արգելքը և մտել է  եզրափակիչ:

Առավել հաջող է հանդես եկել Մամիկոն Խաչատրյանը, որը նժույգթափերում  նվաճել է չեմպիոնի կոչումը:

Հայաստանի մյուս ներկայացուցիչներ Ռոբերտ Գյուլումյանը և Արմեն Պետրոսյանը մրցանակների են արժանացել պտտաձողի և ազատ վարժությունների վարպետ կատարումների համար: Ռոբերտը դարձել է փոխչեմպիոն, իսկ Արմենը նվաճել է բրոնզե մեդալ:

Էրիկ Բաղդասարյանը եզրափակչում չորրորդն է ճանաչվել զուգափայտի  վրա և վեցերորդը՝ հենացատկում:

Մեր մարմնամարզիկներին մրցավայր էր ուղեկցել երիտասարդական  հավաքականի ավագ մարզիչ Արտակ Այդինյանը: