Սպերցյանը կարող է տեղափոխվել Մանչեսթեր Յունայթեդ

Անգլիական մամուլը ողողված է լուրերով, որ «Մանչեսթեր Յունայթեդը» ցանկանում է ձեռք բերել Հայաստանի ազգային հավաքականի ու «Կրասնոդարի» կիսապաշտպան Էդուարդ Սպերցյանի տրանսֆերային իրավունքները։

Այս մասին գրել են միանգամից մի քանի պարբերականներ։ 

Մասնավորապես, Transferfeed-ի տեղեկացմամբ, մանչեսթերյան ակումբը հետևում է «Կրասնոդարի» ավագին՝ որպես Բրունո Ֆերնանդեշի հավանական փոխարինող։

«Անգլիական ակումբը Սպերցյանի համար մրցում է ինչպես Պրեմիեր լիգայի ակումբների, այնպես էլ եվրոպական այլ ակումբների հետ։ Հայաստանի հավաքականի կիսապաշտպանը, որի արժեքը գնահատվում է մոտավորապես 25 միլիոն եվրո, գտնվում է նաև ՊՍԺի ուշադրության կենտրոնում։ Դա վկայում է նրա աճող պահանջարկի մասին։ «Յունայթեդը» նրան դիտարկում է որպես կարևոր համալրում՝ հաշվի առնելով Բրունո Ֆերնանդեշին երկարաժամկետ փոխարինողի անհրաժեշտությունը»։

Goal.com-ն էլ գրում է․ «Թեև հաղորդվում է, որ Բրունո Ֆերնանդեշը մերժել է տեղափոխությունը Սաուդյան Արաբիայի Պրոֆեսիոնալ լիգա, շրջանառվող լուրերը նրա հնարավոր տրանսֆերի մասին չեն դադարում։ «Մանչեսթեր Յունայթեդը» հաջորդ մրցաշրջանում եվրոպական մրցաշարերին մասնակցելու հնարավորություն չի ապահովել, ինչը կարող է ազդել պորտուգալացու որոշման վրա։ Եթե Ֆերնանդեշը իսկապես հեռանա, նրա փոխարինող գտնելը հեշտ չի լինի։ Իսկ եթե Սպերցյանը միանա «Յունայթեդին» մոտ 25 միլիոն եվրոյով (շուրջ 21.5 միլիոն ֆունտ ստերլինգ), ապա «Օլդ Թրաֆորդում» նրա վրա մեծ ճնշում կլինի՝ արդարացնելու այդ վստահությունը»։

Հիշեցնենք, որ Սպերցյանը, «Կրասնոդարի» հետ Ռուսաստանի չեմպիոն դառնալուց հետո, նշել էր, որ ցանկանում է հեռանալ ռուսական ակումբից։