Բասկետբոլի Մ20 հավաքականը նախապատրաստվում է Երևանում կայանալիք Եվրոպայի B դիվիզիոնի առաջնությանը

Հայաստանի բասկետբոլի Մ20 տարեկանների հավաքականը սկսել է նախապատրաստվել հուլիսի 11-20-ը Երևանում կայանալիք Եվրոպայի մինչև 20 տարեկանների առաջնությանը:

Հայաստանի բասկետբոլի ֆեդերացիան տեղեկացնում է, որ հավաքականն ավագ  մարզիչ Փիթ Դոմինգեսի գլխավորությամբ նախապատրաստական մարզումներն անցկացնում է Օլիմպավանում:

Հայաստանի հավաքականը ընդգրկվել է B խմբում, որտեղ կմրցի Չեռնոգորիայի, Էստոնիայի, Լատվիայի և Իռլանդիայի հետ: Առաջին հանդիպումը մեր ընտրանին կանցկացնի հուլիսի 11-ին՝ մրցելով Լատվիայի հավաքականի հետ: Հուլիսի 12-ին կկայանա Չեռնոգորիա-Հայաստան հանդիպումը: Հուլիսի 13-ին մեր ընտրանին կմրցի Իռլանդիայի, իսկ հուլիսի 15-ին՝ Էստոնիայի Մ20 տարեկանների հավաքականի հետ:

Բոլորը հանդիպումները կմեկնարկեն ժամը 20:00-ին: Բասկետբոլի մինչև 20 տարեկանների Եվրոպայի B դիվիզիոնի առաջնությունը կանցկացվի Կարեն Դեմիրճյանի անվան մարզահամերգային համալիրում և Սպորտի կառավարման ենթակայությամբ գործող Միկա մարզահամալիրում:

Հիշեցնենք՝ Երևանը կհյուրընկալի 20 երկրի հավաքականների, որոնք կպայքարեն Եվրոպայի Մ-20 B դիվիզիոնի չեմպիոնի կոչման համար: