Սելարայանը գոլային փոխանցման հեղինակ է դարձել Արգենտինայի գավաթի խաղարկությունում, Ադորյանի թիմն էլ լքել է պայքարը (տեսանյութ)

Արգենտինայի գավաթի խաղարկության 1/16 եզրափակիչում «Բելգրանո դե Կորդոբան», որի կազմում հանդես է գալիս Հայաստանի ազգային հավաքականի կիսապաշտպան Լուկաս Սելարայանը, մրցում էր «Դեֆենսորենս դե Բելգրանոյի» հետ ու առավելության հասավ 3։2 հաշվով։

Սելարայանն ընդգրկված էր իր թիմի մեկնարկային կազմում ու մասնակցեց ամբողջ հանդիպմանը։ 81-րդ րոպեին նրա փոխանցումից իր թիմի համար հաղթական գոլը հեղինակեց Տոբիաս Օստչեգան։ Տեսանյութը՝ այստեղ։

Թեժ մթնոլորտում անցած հանդիպման ընթացքում մրցավարը 3 անգամ դիմեց կարմիր քարտի օգնությանը։

Այս հաղթանակի շնորհիվ «Բելգրանոն» դուրս եկավ հաջորդ փուլ։

Գավաթի խաղարկությունը լքել է ազգային ընտրանու մեկ այլ կիսապաշտպանի՝ Թոմաս Ադորյանի թիմը։ Ադորյանը հայտավորված չի եղել հանդիպմանը, իսկ նրա թիմը 0։2 հաշվով պարտվել է «Տիգրեին»։