Առաջին խմբի նորեկ Սարդարապատ ՖԱ-ն ներկայացրել է նոր գլխավոր մարզչին
«Սարդարապատ» ՖԱ-ն հայտարարել է Ալեքսանդրե Տոռեսի՝ թիմի գլխավոր մարզչի պաշտոնում նշանակվելու մասին:
«Ունենալով ամուր արմատներ ֆրանսիական ֆուտբոլում և նախկինում մարզելով «Բաստիա-Բորգոն», «Ֆուջեյրան» և այլ ակումբներ` Ալեքսանդրեն վճռական է տրամադրված կերտել պատմություն «Սարդարապատի» հետ»,- ասվում է ակումբի տարածած հայտարարության մեջ։
47-ամյա մասնագետը Ֆրանսիայի և Իսպանիայի քաղաքացի է:
Ավելի վաղ հայտնել էինք, որ «Սարդարապատ» ֆուտբոլային ակումբը ստեղծում է պրոֆեսիոնալ ֆուտբոլային թիմ, որը 2025-26 մրցաշրջանում հանդես կգա Հայաստանի Առաջին խմբի առաջնությունում:«Սարդարապատ» ֆուտբոլային ակումբը հիմնադրվել է 2021 թվականին Արմավիրում՝ ֆրանսահայ սպորտային իրավաբան Սևան Կարյանի կողմից։ Ակումբի հիմքում ֆրանսիական Լիգա 1-ում հանդես եկող «Լանսի» մեթոդաբանությունն է։
Անցած 4 տարիների ընթացքում Արմավիրի մի շարք երեխաներ ու պատանիներ մարզվել են այդ մեթոդաբանությամբ, իսկ լավագույնները հնարավորություն են ստացել ուղևորվել Ֆրանսիա և վերապատրաստվել։ «Սարդարապատի» պրոֆեսիոնալ թիմի կազմում են հենց ակադեմիայի սաները: Ակումբն իր տնային հանդիպումները կանցկացնի Արմավիրի քաղաքային մարզադաշտում:
