Հայաստանի ազգային հավաքականի ավագ Վարազդատ Հարոյանը նոր ակումբ ունի։
«Փյունիկի» նախկին պաշտպանը կարիերան կշարունակի հունգարական «Կազինցբարցիկայում», որը Հունգարիայի 2-րդ դիվիզիոնում դարձել է փոխչեմպիոն ու ստացել է Պրեմիեր լիգայում հանդես գալու իրավունք։
Հունգարական ակումբի տնօրեն Սիմոն Միկլոշը նշել է․ «Պետք էր ուժեղացնել պաշտպանությունն ու ավելի լավ տարբերակ գտնել, քան ազգային հավաքականում շուրջ 100 հանդիպում անցկացրած ու հավաքականի ավագ հանդիսացող պաշտպանը՝ դժավր էր պատկերացնել։ Համոզված եմ, որ նա ոչ միայն թիմի արդյունքների, այլ նաև ֆուտբոլիստների անհատական առաջընթացին մեծապես կնպաստի»։
Հարոյանն էլ նշել է, որ հավաքականի ֆուտբոլիստներից իմացել է, որ Հունգարիայի առաջնությունն ուժեղ է, իսկ երկիրն ուղղակի գեղեցիկ․ «Գիտեմ, որ սա ակումբի 1-ին տարին է Հունգարիայի Պրեմիեր լիգայում։ Եկել օգնելու թիմին՝ հաղթանակներ տոնել։ Մենք պայքարելու ենք յուրաքանչյուր միավորի համար»։
Հիշեցնենք, որ Հարոյանը «Փյունիկ» էր տեղափոխվել չինական «Ցինդաո Ուեստ Քոստից»։ Իր կարիերայի ընթացքում նա նաև հանդես է եկել Իրանը, Ռուսաստանը, Ղազախստանը ներկայացնող թիմերում ու իսպանական «Կադիսում»։
32-ամյա պաշտպանը Հայաստանի ազգային հավաքականում անցկացրել է 92 հանդիպում՝ դառնալով 4 գոլի հեղինակ։
