Շտապեցինք կարծել, որ հանդիպումը վաղ է ավարտվել և պատժվեցինք. Նոայի գլխավոր մարզիչը՝ Բուդուչնոստի հետ ոչ-ոքիի մասին
Չեմպիոնների լիգայի որակավորման 1-ին փուլի պատասխան խաղում «Նոան» հյուրընկալվել էր «Բուդուչնոստին» ու ոչ-ոքի՝ 2:2 հաշվով ավարտել հանդիպումը: Երկխաղյա դիմակայությունում Հայաստանի չեմպիոնը 3:2 հաշվով հաղթանակ է տարել և դուրս եկել հաջորդ փուլ:
«Ցանկանում եմ շնորհավորել իմ ֆուտբոլիստներին: Սա անչափ կարևոր հանդիպում էր մեզ համար: Գիտեինք, որ Պոդգորիցայում միայն եղանակը շոգ չէր լինելու, նաև թեժ մթնոլորտ էր մարզադաշտում։
Մենք շտապեցինք կարծել, որ հանդիպումը վաղ է ավարտվել և պատժվեցինք։ Ֆուտբոլում՝ հատկապես եվրագավաթներում, փոքր սխալների համար միանգամից պատժվում ես: Ամենակարևորն այն է, որ անցանք երկրորդ փուլ», - Սանդրո Պերկովիչի խոսքերն է փոխանցում «Նոայի» մամուլի քարտուղարությունը:
