ՀՖՖ մրցավարներն ու տեսուչները հավաք կանցկացնեն Ծաղկաձորում
Հուլիսի 19-27-ը Ծաղկաձորում կանցկացվի Հայաստանի Ֆուտբոլի Ֆեդերացիայի մրցավարների և տեսուչների ուսումնամարզական հավաքը, որը նախապատրաստական կարևոր փուլ է նոր մրցաշրջանից առաջ։ Այս մասին հայտնում է ՀՖՖ պաշտոնական կայքը:
Հավաքը կանցկացվի երկու փուլով։ Առաջին փուլին կմասնակցեն Fastex Պրեմիեր Լիգայի հանդիպումները սպասարկող մրցավարներն ու տեսուչները, իսկ երկրորդ փուլում ներգրավված կլինեն Առաջին խմբի և մանկապատանեկան մրցաշարերի մրցավարներն ու տեսուչները։
Ուսումնամարզական հավաքը կազմված կլինի տեսական և գործնական բաղադրիչներից։ Տեսական պարապմունքների ընթացքում կվերլուծվեն նախորդ մրցաշրջանի խաղերի կարևոր դրվագները, կքննարկվեն Ֆուտբոլ խաղի կանոններում կատարված փոփոխությունները, ինչպես նաև կուսումնասիրվեն ՈՒԵՖԱ-ի և ՖԻՖԱ-ի ուղեցույցները։ Տեսուչների հետ կանցկացվեն նաև մրցավարների գնահատման համակարգի կիրառման վերաբերյալ դասընթացներ։
Բացի տեսական պարապմունքներից, օրական երկու անգամ կանցկացվեն ֆիզպատրաստության մարզումներ՝ մասնակիցների ֆիզիկական վիճակի բարելավման նպատակով։
Հավաքի ավարտից հետո Երևանում կկազմակերպվեն տեսական և ֆիզպատրաստության քննություններ՝ մասնակիցների պատրաստվածության մակարդակի պաշտոնական հաստատման նպատակով։
Ընդհանուր առմամբ, հավաքին կմասնակցեն 54 մրցավար և 13 տեսուչ, այդ թվում՝ կին մրցավարներ և տեսուչներ։
Հավաքի ղեկավարը կլինի ՀՖՖ մրցավարական կոմիտեի նախագահ Սլավիկ Ղազարյանը։ Տեսական պարապմունքները կվարի ՀՖՖ Մրցավարական դեպարտամենտի պետ Արման Ալաբերքյանը, իսկ ֆիզպատրաստության մարզումները՝ Մեսրոպ Ղազարյանը։
