Հունգարական «Ֆերենցվարոշի» գլխավոր մարզիչ Ռոբի Քինը «Նոայի» հետ Չեմպիոնների լիգայի որակավորման երկրորդ փուլի առաջին խաղից առաջ տեղի ունեցած մամուլի ասուլիսի ընթացքում անդրադարձել է նաև թիմի հայ կիսապաշտպան Էդգար Սևիկյանին:
«Էդգարը շատ տաղանդավոր խաղացող է։ Երբ ես եկա «Ֆերենցվարոշ», նա թիմում չէր, բայց վերադառնալուց հետո ես նրան ասացի, որ մենք հույսներս նրա վրա ենք դնում։ Ինձ դուր է գալիս նրա խաղը, նա տեխնիկապես լավ է խաղում, լավ է խաղում մեն-մենակ, նա կարող է մեծ ուժ լինել մեզ համար։ Նորեկները, այդ թվում՝ Էդգարը, լավ են հարմարվել, բոլորը պատրաստ են խաղալ»,- իռլանդացի մասնագետի խոսքերն է փոխանցում հունգարական ակումբի պաշտոնական կայքը։
«Նոա»-«Ֆերենցվարոշ» հանդիպումը կկայանա այսօր՝ հուլիսի 22-ին, Աբովյանի քաղաքային մարզադաշտում և կմեկնարկի ժամը 20:00-ին:
