Եվս մեկ մեդալ՝ հրաձգության Մ18 տարեկանների Եվրոպայի առաջնությունից

Էստոնիայի մայրաքաղաք Տալլինում ընթացող հրաձգության Մ16 և Մ18 տարեկանների Եվրոպայի առաջնության մրցումային վերջին օրը Հայաստանի ներկայացուցիչներն արծաթե մեդալ են նվաճել Մ18 տարեկանների պայքարի 10 մ օդամղիչ ատրճանակ տրիո մրցաձևում։

Գոռ Մանուչարյան/Գրիգոր Պողոսյան/Արմեն Գևորգյան եռյակը որակավորման փուլում խոցել է 880 միավոր և դուրս եկել կիսաեզրափակիչ։ Կիսաեզրափակչում հայ հրաձիգները 12:10 հաշվով առավելության են հասել Լեհաստանի նկատմամբ, իսկ եզրափակչում 8:12 հաշվով զիջել են բուլղարացիներին՝ դառնալով ԵԱ-ի արծաթե մեդալակիր։

Ավելի վաղ Գոռ Մանուչարյան/Գրիգոր Պողոսյան/Արմեն Գևորգյան եռյակը դարձել էր 10մ օդամղիչ ատրճանակ մրցաձևի թիմային մրցման հաղթող։ Հայաստանի ներկայացուցիչները նաև Եվրոպայի ռեկորդ էին սահմանել՝ վաստակելով 1120 միավորով:

Հայաստանի հրաձգության պատանեկան հավաքականը մրցավայր է մեկնել 5 մարզիկով։ Հայաստանը ներկայացրել են ատրճանակավարներ Գրիգոր Պողոսյանը, Գոռ Մանուչարյանը, Արմեն Գևորգյանը, Հայկ Սարգսյանը և հրացանակիր Դավիթ Խաչատրյանը:

Հայաստանի ներկայացուցիչները մրցավայր են մեկնել Հայաստանի հրաձգության ֆեդերացիայի գլխավոր քարտուղար Արեգ Սարիբեկյանի և հավաքականի ավագ մարզիչ Անդրանիկ Այվազյանի գլխավորությամբ։

Եվրոպայի Մ16 և Մ18 տարեկանների առաջնությունը կտևի մինչև փետրվարի 15-ը: Մրցմանը շուրջ 240 հրաձիգ է մասնակցում։