Ցրվենա Զվեզդային չհաջողվեց հաղթահարել Պաֆոսի արգելքը․ Տիկնիզյանի թիմը կխաղա ԵԼ-ի լիգայի փուլում

Չեմպիոնների լիգայի որակավորման փլեյ-օֆֆի պատասխան խաղում «Ցրվենա Զվեզդան» հյուրընկալվել էր «Պաֆոսին»։ Հանդիպումն ավարտվեց 1։1 հաշվով։

Հանդիպման հաշիվը բացեց Միրկո Իվանիչը՝ 60-րդ րոպեին։ 89-րդ րոպեին Ժաժան, տուգանայինի խաղարկումից հետո, վերականգնեց հաշվի հավասարությունը՝ ապահովելով Կիպրոսի չեմպիոնի հաղթանակը դիմակայությունում։ Թիմերի միջև առաջին խաղն ավարտվել էր 2։1 հաշվով՝ «Պաֆոսի» հաղթանակով։

Հայաստանի ազգային հավաքականի պաշտպան Նաիր Տիկնիզյանն ընդգրկված էր «Ցրվենա Զվեզդայի» մեկնարկային կազմում ու մասնակցեց ամբողջ հանդիպմանը։ 88-րդ րոպեին նրա խախտումից տանտերերը վաստակեցին տուգանայինի իրավունք, որից լավ օգտվեց Ժաժան։

Այսպիսով, Սերբիայի չեմպիոնը հանդես կգա Եվրոպա լիգայի լիգայի փուլում։

Հիշեցնենք, որ ավելի վաղ որակավորման ուղիով Չեմպիոնների լիգայի լիգայի փուլի ուղեգիր էին նվաճել նաև ղազախական «Կայրաթը» և նորվեգական «Բուդյո-Գլիմտը»։ Վաղը պարզ կդառնա եզրափակիչ փուլի մասնակից վերջին 4 թիմերի անունները։

Վերջին ուղեգրերը միմյան մեջ կբաշխեն հետևյալ զույգերը՝

«Բենֆիկա»-«Ֆեներբախչե» (0։0)
«Կոբենհագեն»-«Բազել» (1։1)
«Բրյուգե»-«Ռեյնջերս» (3։1)
«Ղարաբաղ»-«Ֆերենցվարոշ» (3։1)