Լավ շանսեր ունենք Ազգերի լիգայի համար. ժամանակն է մեր երկրին մեծ հաջողություններ նվիրել . Մարալ Արթին
Կանանց Ազգերի լիգայի 2025 թվականի խաղարկության Հայաստան-Լիխտենշտեյն խաղին ընդառաջ հավաքականի ավագ Մարալ Արթինը կիսվել է թիմի տրամադրվածության և ակնկալիքների մասին:
«Ես դրական եմ տրամադրված և փորձում եմ թիմին պատրաստել դրականին: Որպես ավագ՝ կարող եմ վստահորեն ասել, որ մենք շատ լավ շանսեր ունենք Ազգերի լիգայի համար։ Թիմը ամբողջական է, և մենք թիմում ունենք փորձառու, բայց նաև նոր և տաղանդավոր խաղացողներ: Այս պահին ամենակարևորն այն է, որ մրցաշարը սկսենք հաղթանակով և երկրորդ խաղից հետո աղյուսակում լավ ցուցանիշ ունենանք:
Երկու խաղերն էլ տանն են, և դա նույնպես առավելություն է մեզ համար, իսկ մենք ամեն ինչ անելու ենք այս առավելությունից օգտվելու համար: Հաղթելու հնարավորություն միշտ կա, մենք պետք է որպես թիմ խաղադաշտում և դրանից դուրս գործենք ու հավատանք ինքներս մեզ:
Կարծում եմ՝ ժամանակն է մեր երկրին մեծ հաջողություններ նվիրել: Ես հավատում եմ իմ թիմին և վստահ եմ, որ ի վերջո հաջող արդյունքներ կունենանք»:
Կանանց Հայաստանի ազգային հավաքականն այսօր կմեկնարկի ՈւԵՖԱ Կանանց Ազգերի լիգայում` ընդունելով Լիխտենշտեյնի հավաքականին:
Հանդիպումը կկայանա Արմավիրի Հակոբ Տոնոյանի անվան «Քաղաքային» մարզադաշտում և կմեկնարկի ժամը 14:30-ին:
