Կրասնոդարի գլխավոր սկաուտը բացահայտել է Սպերցյանի ձախողված տրանսֆերի մանրամասները
«Կրասնոդարի» սկաուտինգի ղեկավար Մաքսիմ Բուզնիկինը «Կրասնոդար» հեռուստաալիքին տված բացառիկ հարցազրույցում հաստատել է, որ անգլիական ակումբները հետաքրքրված են Հայաստանի հավաքականի ֆուտբոլիստ Էդուարդ Սպերցյանի ծառայություններով։ Առաջարկները ստացվել են տրանսֆերային պատուհանի փակվելուց առաջ, և ակումբը պատրաստ էր դրանք քննարկել։
«Ցուլերի» ամառային տրանսֆերային ռազմավարությունը սկզբնապես կառուցվել է ավագի հնարավոր հեռանալու մտքով։
«Առաջարկներ եղել են նույնիսկ տրանսֆերային պատուհանի փակվելուց առաջ։ Բոլորը գրում էին դրա մասին, բայց մենք, հավանաբար, երկու շաբաթ առաջ գիտեինք, որ պետք է որոշում կայացնենք և ձեռքբերումներ կատարենք նախկինում սահմանված տրանսֆերային մոդելի համաձայն։ Մենք անընդհատ ապրում էինք այն գիտակցությամբ, որ Սպերցյանը կարող է հեռանալ մեզանից։ Եվ այս հանգամանքներից ելնելով՝ մենք կառուցեցինք մեր տրանսֆերային արշավը՝ կանխատեսելով, թե ինչպես այն կարող է զարգանալ։ Բայց քանի որ հասկացանք, որ Սպերցյանը մնում է, մենք մի փոքր փոփոխեցինք մեր տրանսֆերային մոդելը։ Մենք ստիպված էինք վերակառուցվել և կնքել այն պայմանագրերը, որոնք տեսաք», - ասաց Մաքսիմ Բուզնիկինը։
Ամառային տրանսֆերային պատուհանի ընթացքում բուռն քննարկումներ էին ընթանում «Կրասնոդարի» ավագ Էդուարդ Սպերցյանի հնարավոր տեղափոխության վերաբերյալ: Անգլիական «Սաութհեմփթոնը» և «Լիդսը» համարվում էին նրա տրանսֆերի հիմնական հավակնորդները, սակայն սպասվող գործարքը այդպես էլ չկայացավ։
