Հայաստանն ունի բարձրորակ ֆուտբոլիստներ ու արտագնա խաղում հաղթելը կամ նույնիսկ ոչ-ոքի խաղալը շատ դժվար կլինի․ Մարկո Ռոսի
Աշխարհի 2026 թվականի առաջնության ընտրական փուլի 3-րդ տուրում Հայաստանի հավաքականը հյուրընկալվել էր Հունգարիայի ընտրանուն ու զիջեց 0։2 հաշվով։ Հանդիպումից հետո տեղի է ունեցել Հունգարիայի ազգային հավաքականի գլխավոր մարզիչ Մարկո Ռոսիի մամուլի ասուլիս․
Ներկայացնում ենք 61-ամյա մասնագետի ուշագրավ մտքերը․
«Առաջին կեսում մենք լավ էինք վերահսկում գնդակը, քիչ էինք ռիսկերի դիմում և փորձում էինք դուրս բերել մրցակցին պաշտպանությունից, սակայն չկարողացանք օգտագործել այն երկու-երեք պահերը, որոնք ստեղծեցինք։ Պետք է ավելի ճիշտ որոշումներ ընդունեինք մրցակցի դարպասի առաջ, բացի այդ՝ կատարեցինք չափազանց շատ անհարկի սխալներ, ինչի հետևանքով չկարողացանք ուժեղացնել հարձակողական խաղը։ Տակտիկական լուրջ որոշումներ էինք կայացնում, վերահսկում էինք հանդիպման ընթացքը և երկրորդ կեսում արժանիորեն հաղթեցինք, թեև պետք է խոստովանել՝ հաղթանակը հեշտ չտրվեց։ Մի փոքր ավելի հաջողության դեպքում կարող էինք ավելի շուտ ապահովել հաղթանակը, սակայն ևս մեկ անգամ ապացուցվեց, որ եթե չօգտագործես քո հնարավորությունները, ինքդ ես դժվարացնում կյանքդ։
Հայաստանն ունի մի շարք բարձրորակ ֆուտբոլիստներ, և նրանք շատ հզոր էրին պաշտպանությունում։ Նրանք կարողանում էին արագ հակագրոհներ կազմակերպել գնդակը խլելուց հետո, որոնք վտանգավոր էին։ Գլխավորը այն է, որ մենք երեք միավոր վերցրինք, սակայն պարզ էր, որ նրանց հետ արտագնա խաղում հաղթելը կամ նույնիսկ ոչ ոքի խաղալը շատ դժվար կլինի։ Այժմ մեզ սպասում է Պորտուգալիան, որը խմբի մյուս երեք թիմերից ավելի ուժեղ է։ Կփորձենք երեքշաբթի խաղալ այնպես, որ մեր դարպասը մշտական ճնշման տակ չլինի և կփորձենք այդ հանդիպումից առավելագույնը ստանալ»։
Հիշեցնենք, որ Հունգարիայի կազմում գոլերը հեղինակեցին Դանիել Լուկաչը՝ 56-րդ րոպեին ու Ժոմբոր Գրուբերը՝ հիմնական ժամանակին ավելացված 4-րդ րոպեին։
Հոկտեմբերի 14-ին Հայաստանի հավաքականը կյուրընկալվի Իռլանդիայի ընտրանուն։
