Բուլղարիայի 14-ակի չեմպիոն «Լուդոգորեցը» առաջիկա ժամերի ընթացքում պաշտոնանկ կանի թիմի գլխավոր մարզիչ Ռուի Մոտային: Այս մասին հայտնում է տեղական Dsport հրատարակությունը:
Նշվում է, որ հինգշաբթի Բուլղարիայի գավաթի խաղարկության շրջանակում «Չեռնոմորեցի» հետ կայանալիք խաղում «Լուդոգորեցը» արդեն նոր գլխավոր մարզիչ կունենա: Նշվում է նաև մարզչի ժամանակավոր պաշտոնակատարի անունը. նա կլինի «Լուդոգորեցի» երկրորդ թիմի գլխավոր մարզիչ Տոդոր Ժիվոնդովը:
Երեկ՝ հոկտեմբերի 28-ին, «Լուդոգորեցը» Բուլղարիայի առաջնության 13-րդ տուրում մրցակցի հարկի տակ 4:5 հաշվով պարտվել է ԲԿՄԱ 1948-ին թրիլերային խաղում։ «Լուդոգորեցը» 23 միավորով չորրորդ տեղն է զբաղեցնում Բուլղարիայի առաջնության մրցաշարային աղյուսակում։
Հիշեցնենք՝ Մոտան հունիսի 13-ին է գլխավորել «Լուդոգարեցը»։ Պորտուգալացի մասնագետը նախորդ մրցաշրջանում գլխավորում էր «Նոան», որի հետ դարձել է Հայաստանի չեմպիոն ու գավաթակիր, մասնակցել Կոնֆերենցիաների լիգայի Լիգայի փուլին։
