Ռեալ Սոսյեդադի մարզիչը բացատրել է Զախարյանի փոխարինումը Լեգանեսի հետ խաղում, որում Արսենը գոլ խփեց
«Ռեալ Սոսյեդադի» գլխավոր մարզիչ Իմանոլ Ալգուասիլը նշել է հայազգի կիսապաշտպան Արսեն Զախարյանի փոխարինման պատճառը Իսպանիայի Լա լիգայի 25-րդ տուրի՝ «Լեգանեսի» դեմ խաղում (3:0):
«Զախարյանը փոխարինում խնդրեց, քանի որ կարծում եմ, որ դա կարող է փոքր լարվածություն լինել, թեև թվում է, որ դա կարող է լինել նաև ավելի լուրջ բան, հնարավոր է՝ պատռվածք: Ես պետք է ավելի մանրամասն գնահատեմ նրա վիճակը...
Հուսով եմ, որ լուրջ բան չկա: Նա և Ագերը (խաղում վնասվածք էր ստացել նաև մարոկկացի պաշտպանը - խմբ.) հսկողության տակ են։ Ինչ վերաբերում է կոնկրետ Զախարյանին՝ հուսով եմ, որ դա պարզապես ծանրաբեռնվածություն է մեկնարկային կազմում նրա առաջին խաղից հետո։ Ամեն դեպքում, պետք է սպասել արդյունքներին, քանի որ խաղերի այսպիսի խիտ գրաֆիկի դեպքում ակնհայտորեն կուտակվում են բազմաթիվ խնդիրներ և հոգնածություն։ Բժշկական եզրակացությունը կլինի վաղը: Տեսնենք՝ ինչ կլինի. դա հիմա ամենակարևորն է», - Ալգուասիլի՝ հետխաղային մամուլի ասուլիսին ասված մեկնաբանությունը մեջբերում է Futbol Fantasy-ն:
Հիշեցնենք, որ այս խաղում Զախարյանն ընթացիկ մրցաշրջանում իր առաջին գոլն է խփել՝ առաջին անգամ նաև խաղադաշտ դուրս գալով իր թիմի մեկնարկային կազմում:
