Կրասնոդարը հաղթեց Մոսկվայի Սպարտակին՝ խաղավերջում մնալով 9 հոգով․ Սպերցյանը մասնակցեց հանդիպմանը

Ռուսաստանի Պրեմիեր լիգայի 14-րդ տուրում «Կրասնոդարն» ընդունել էր Մոսկվայի «Սպարտակին» ու հաղթեց 2։1 հաշվով։

Հանդիպման հաշիվը բացեց Ալեքսանդր Չերնիկովը՝ 18-րդ րոպեին։ 59-րդ րոպեին Ջոն Կորդոբան կրկնապատկեց իր թիմի առավելությունն ու 88-րդ րոպեին ստանալով 2-րդ դեղին քարտը հեռացվեց խաղադաշտից։ 2 րոպե անց Լևի Գարսիան կրճատեց հաշվի տարբերությունը։

Հիմնական ժամանակին ավելացրած 5-րդ րոպեին խաղադաշտից հեռացվեց նաև Դուգլաս Ագուստոն։

Հայաստանի ազգային հավաքականի կիսապաշտպան Էդուարդ Սպերցյանն ընդգրկված էր «Կրասնոդարի» մեկնարկային կազմում ու փոխարինվեց 73-րդ րոպեին։

Այս հաղթանակի շնորհիվ Ռուսաստանի գործող չեմպիոնը 32 միավորով գլխավորում է մրցաշարային աղյուսակն ու հաջորդ տուրում կմրցի «Բալթիկայի» հետ։