Ռոնալդուն բաց կթողնի Հայաստանի հավաքականի հետ խաղը

Պորտուգալիայի հավաքականի 40-ամյա հարձակվող Կրիշտիանու Ռոնալդուն կարիերայում առաջին անգամ կարմիր քարտ է ստացել ազգային հավաքականի խաղում։ Նոյեմբերի 13-ին ՈՒԵՖԱ-ի 2026 թվականի աշխարհի առաջնության ընտրական փուլի՝ Իռլանդիայի հավաքականի դեմ խաղի 59-րդ րոպեին, 0-2 հաշվի պայմաններում, Ռոնալդուն հեռացվել է խաղադաշտից:

Այսպիսով, պորտուգալացիների ավագը բաց կթողնի նոյեմբերի 16-ին Հայաստանի հավաքականի հետ Լիսաբոնում կայանալիք խաղը:

Կրիշտիանու Ռոնալդուն նախկինում Պորտուգալիայի կազմում անցկացրել էր 225 խաղ, խփել 143 գոլ և կատարել 46 գոլային փոխանցում, և երբեք չէր հեռացվել խաղադաշտից։  Ակումբային խաղերում Ռոնալդուն ստացել է ութ ուղիղ կարմիր քարտ և չորսը՝ երկրորդ դեղին քարտի պատճառով։

Պորտուգալիա-Հայաստան հանդիպումը կմեկնարկի Երևանի ժամանակով 18:00-ին: