Ուրախ եմ վերադառնալ տուն և խաղալ հայկական թիմի դեմ. Բիչախչյան

«Լեգիայի» և Հայաստանի ազգային հավաքականի կիսապաշտպան Վահան Բիչախչյանը «Նոայի» դեմ առաջիկա խաղից առաջ հանդիպել է հայ լրագրողների հետ:

ԿԼ լիգայի փուլի՝ «Նոա»-«Լեգիա» հանդիպումը կկայանա դեկտեմբերի 11-ին և կմեկնարկի 21:45-ին:

Բիչախչյանը խոստովանել է, որ առաջիկա խաղն իր համար առանձնահատուկ նշանակություն ունի:

«Շատ ուրախ եմ տուն վերադառնալու համար։ Սա իմ առաջին խաղն է հայկական թիմի դեմ, իմ հայրենիքը ներկայացնող թիմի դեմ։ Թեթև վնասվածքից հետո ինձ շատ լավ եմ զգում։ Պատրաստ եմ և անհամբեր սպասում եմ այս խաղին», — նշել է Վահանը:

Ֆուտբոլիստը նաև խոսել է մրցակցի և առաջիկա խաղից ունեցած սպասելիքների մասին․

«Մենք շատ լավ վերլուծել ենք մրցակցին։ Դիտել ենք նրանց խաղերը։ Սա շատ լավ ֆուտբոլիստներով համալրված թիմ է, որը խաղում է բարձր ինտենսիվությամբ։ Նրանք լավ կազմակերպված են։ Գիտենք, որ հեշտ հանդիպում չի լինելու: Երկու թիմերն էլ ճգնաժամում են։ Հույս ունենք, որ կկարողանանք հաղթել վաղը և ընդհատել  այս պարտությունների շարքը»։