Նոան Կոնֆերենցիաների լիգայի անցումային փլեյ-օֆֆում է

Կոնֆերենցիաների լիգայի հիմնական փուլի վերջին՝ 6-րդ տուրում «Նոան» Լեհաստանում մրցում էր Կիևի «Դինամոյի» հետ ու զիջեց 0։2 հաշվով։

Հանդիպման հաշիվը բացեց Վլադիսլավ Կաբաևը՝ 27-րդ րոպեին։ 2-րդ կեսի մեկնարկից 5 րոպե անց Մատվեյ Պոնոմարենկոն կրկնապատկեց ուկրաինական թիմի առավելությունը։

Չնայած պարտությանը, Սանդրո Պերկովիչի գլխավորած թիմը Կոնֆերենցիաների լիգայի հիմնական փուլում վաստակելով 8 միավոր գրավեց 19-րդ հորիզոնականը՝ նվաճելով անցումային փլեյ-օֆֆի ուղեգիր։

Հիշեցնենք, որ Հայաստանի չեմպիոնը հաղթել էր խորվաթական «Ռիյեկային», լեհական «Լեգիային», ոչ-ոքի էր խաղացել ռումինական «Ունիվերսիտատեա Կրայովայի» ու շոտլանդական «Աբերդինի» հետ ու զիջել էր չեխական «Սիգմային» ու «Դինամո Կիևին»։

Այսպիսով, անցումային փլեյ-օֆֆում «Նոայի» հավանական մրցակիցներն են Սլովենիան ներկայացնող «Ցելյեն» կամ նիդերլանդական «ԱԶ Ալկմարը»։ Վիճակահանությունը տեղի կունենա հունվարի 16-ին։ 

Անցումային փլեյ-օֆֆի 1-ին խաղերը կկայան փետրվարի 19-ին, պատասխան հանդիպումները՝ փետրվարի 26-ին։