Արսեն Զախարյանը կրկին վնասվածք է ստացել․ Մեկնաբանել է մարզիչը
«Ռեալ Սոսյեդադի» հայազգի կիսապաշտան Արսեն Զախարյանը ուղիղ ազդրի մկանի վնասվածք է ստացել Իսպանիայի Լա լիգայի 25-րդ տուրի՝ «Լեգանեսի» հետ խաղում (3:0):
Իսպանական թիմի գլխավոր մարզիչ Իմանոլ Ալգուասիլը մեկնաբանել է ֆուտբոլիստի վնասվածքը:
«Սա շատ ցավալի է և՛ Արսենի համար, որովհետև նա մեծ ջանքեր է գործադրել նախկին վնասվածքից հետո վերականգնվելու համար, և՛ թիմի համար, քանի որ Արսենը մեզ շատ կօգներ»,- Ալգուասիլի խոսքերն է մեջբերում COPE-ը։
Ընթացիկ մրցաշրջանում Զախարյանը շարունակաբար վերականգնվում է վնասվածքներից: «Լեգանեսի» դեմ վերջին տուրի խաղում Զախարյանն ընթացիկ մրցաշրջանում առաջին անգամ իր թիմի մեկնարկային կազմում էր դուրս եկել խաղադաշտ, և խփել էր առաջին գոլը: Ընդհանուր առմամբ, «Դինամոյի» նախկին խաղացողը ընթացիկ մրցաշրջանի բոլոր մրցաշարերում չորս խաղի է մասնակցել, որոնցում դարձել է մեկ գոլի և մեկ գոլային փոխանցման հեղինակ։
Զախարյանի թիմն Իսպանիայի գավաթի կիսաեզրափակի շրջանակում այսօր սեփական հարկի տակ կընդունի Մադրիդի «Ռեալին», սակայն հայազգի ֆուտբոլիստը չի մասնակցի խաղին: Ֆուտբոլիստի վերադարձը ընդհանուր խումբ կախված կլինի նրա ապաքինման դինամիկայից։
Հիշեցնենք, որ ամռանը Զախարյանը վիրահատության էր ենթարկվել աջ կոճի պերոնալ ջիլերի վնասվածքի պատճառով և բաց թողել գրեթե ութ ամիս։
