Ուրարտուի սանը հրազենային վնասվածք էր ստացել. նախկին ֆուտբոլիստի մահվան գործով մեկ անձ է ձերբակալվել
Ավելի վաղ հայտնել էինք, որ կյանքից հեռացել է «Ուրարտու» ակադեմիայի սան Վահան Պետրոսյանը:
Վահան Պետրոսյանը Վարդենիսում էր ծառայում, նա Երևանից է։ Վահանը 6 ամսվա ծառայող էր։ Նրա դին հայտնաբերվել էր հունվարի 14-ին՝ ժամը 09:50-ի սահմաններում՝ հրազենային վնասվածքով։
Քննչական կոմիտեն հաղորդում է, որ զինծառայողի մահվան դեպքի առթիվ 2026 թվականի հունվարի 14-ին նախաձեռնված քրեական վարույթի նախաքննության ընթացքում մեկ անձի նկատմամբ հարուցվել է հանրային քրեական հետապնդում՝ Քրեական օրենսգրքի 522-րդ հոդվածի 2-րդ մասի 2-րդ և 3-րդ կետերով (զինծառայողին անզգուշությամբ ինքնասպանության հասցնելը)։
Վերջինս ձերբակալվել է։ Նրա նկատմամբ կալանքը որպես խափանման միջոց կիրառելու վերաբերյալ միջնորդություն է ներկայացվել դատարան։
Վահանը իր ֆուտբոլային քայլերը սկսել է 6 տարեկանից «Ուրարտու» ակադեմիայի մանկապատանեկան թիմերում, այնուհետև հանդես է եկել «Ուրարտու-2»-ի կազմում:
