Ինտեր-Արսենալ. Մխիթարյանը միլանյան թիմի հավանական մեկնարկային կազմում է

Այսօր՝ հունվարի 20-ին, Չեմպիոնների լիգան վերադառնում է ընդմիջումից հետո։ Կանցկացվի 7-րդ տուրը, որի շրջանակում Միլանի «Ինտերը» կմրցի «Արսենալի» դեմ:

ՈՒԵՖԱ-ի պաշտոնական կայքը ներկայացնում է թիմերի հավանական մեկնարկային կազմերը:

«Ինտեր»․ Սոմեր, Բիսեկ, Ականջի, Բաստոնի, Լուիս Էնրիկե, Բարելլա, Զելինսկի, Մխիթարյան, Դիմարկո; Լաուտարո Մարտինես, Թյուրամ,
Չեն խաղա․ Չալհանօղլու (սրունքի մկան), Դի Ջեննարո (ձեռք), Դումֆրիս (կոճ), Ժոզեպ Մարտինես (կոճ)
Կասկածելի․ չկա
Քարտերի վտանգի տակ․ Լաուտարո Մարտինես, Մխիթարյան

«Արսենալ»․ Ռայա, Ուայթ, Սալիբա, Գաբրիել, Թիմբեր, Սուբիմենդի, Ռայս, Էդեգոր, Սակա, Դյոկերեշ, Տրոսսար
Չեն խաղա․ Կալաֆիորի (մկան), Դաուման (կոճ)
Կասկածելի․ Ինկապիե (ազդր)
Քարտերի վտանգի տակ․ Մերինո, Նյորգոր, Ռայս

Անցած մրցաշրջանում թիմերը դարձյալ հանդիպել էին միմյանց։ Դարձյալ՝ ընդհանուր փուլում, դարձյալ՝ Իտալիայում։ Այդ ժամանակ «Ինտերը» ավելի ուժեղ գտնվեց՝ հաղթելով 1:0 հաշվով․ գոլը առաջին խաղակեսի վերջնամասում 11-մետրանոցից խփեց Հաքան Չալհանօղլուն։ 

Այդ ժամանակվանից շատ բան է փոխվել։ Իտալական ակումբը փոխել է գլխավոր մարզչին, իսկ «Արսենալը» դարձել է էլ ավելի ուժեղ, թեև տուժում է վնասվածքներից։ Մասնագետները սպասում են կազմի ռոտացիա և լրացուցիչ հնարավորություններ պահեստայինների համար։ 

«Սան Սիրոյում» կայանալիք խաղը կարևորագույն նշանակություն ունի, առաջին հերթին, տանտերերի համար, որոնք դեռևս պայքարում են մրցաշարի 1/8 եզրափակիչ փուլի ուղեգրի համար։

«Ինտերը» մեկնարկում տարած չորս հաղթանակից հետո կրել է երկու անընդմեջ պարտություն՝ Մադրիդի «Ատլետիկոյից» և «Լիվերպուլից», և նահանջել է աղյուսակի վեցերորդ հորիզոնական։ Ի տարբերություն դրա, «Արսենալն» արդեն ապահովել է իր տեղը լավագույն 8-յակում:

«Ինտեր»-«Արսենալ» հանդիպումը կմեկնարկի ուղիղ կեսգիշերին: