Փյունիկը նորեկ ունի
«Փյունիկի» շարքերն է համալրել գվինեացի հարձակվող Մոմո Յանսանեն, տեղեկացնում է երևանյան ակումբի մամուլի ծառայությունը։
28-ամյա ֆուտբոլիստն իր կարիերան սկսել է Գվինեայի «Հաֆիայում», ապա խաղացել է Մարոկկոյի «ՖՈւՍ Ռաբաթ» ակումբում։
2019 թվականին Յանսանեն տեղափոխվել է բելառուսական «Իսլոչ», որտեղ անցկացրած 57 խաղում դարձել է 23 գոլի և 11 գոլային փոխանցման հեղինակ։ 2019 թվականի մրցաշրջանի արդյունքներով նա ճանաչվել է «Իսլոչի» լավագույն ֆուտբոլիստ։
2021 թվականի հուլիսին Մոմո Յանսանեն պայմանագիր է կնքել Տիրասպոլի «Շերիֆի» հետ, որի կազմում մասնակցել է Չեմպիոնների լիգայի 2021/22 թթ․ խաղարկության խմբային փուլի հանդիպումներին։ Մասնավորապես խմբային փուլում Յանսանեն գրավել է Դոնեցկի «Շախտյորի» դարպասը։ 2021/22 թթ․ մրցաշրջանում նա «Շերիֆի» հետ դարձել է Մոլդովայի չեմպիոն և գավաթակիր։
Գվինեացի ֆուտբոլիստն իր կարիերայի ընթացքում խաղացել է նաև ռուսական «Նիժնի Նովգորոդում», խորվաթական «Ռիեկայում», Քութայիսիի «Տորպեդոյում» և ադրբեջանական «Սումգայիթում»։
Մոմո Յանսանեի նախորդ թիմը Կիպրոսի ուժեղագույնների լիգայի ներկայացուցիչ «Օմոնիա Արադիպուն» էր, որտեղ հանդես է եկել 2025 թվականի օգոստոսից։ Կիպրոսյան թիմի կազմում ընթացիկ մրցաշրջանում նա մասնակցել է 14 խաղի և դարձել 3 գոլի հեղինակ։
Յանսանեն ժամանակին ելույթ է ունեցել Գվինեայի Մ-20 և Մ-23 տարեկանների հավաքականներում, իսկ 2021 թվականին իր նորամուտն է նշել Գվինեայի ազգային հավաքականում։
«Փյունիկ» ՖԱ-ն բարի գալուստ և հաջող մրցելույթներ է մաղթել Մոմո Յանսանեին։
