Ինտերը դուրս է եկել Իտալիայի գավաթի կիսաեզրափակիչ. Մխիթարյանը մասնակցել է խաղին

Իտալիայի գավաթի քառորդ եզրափակչում «Ինտերը» սեփական հարկի տակ ընդունել է «Տորինոյին» և 2:1 հաշվով հաղթանակ է տարել՝ դուրս գալով կիսաեզրափակիչ:

Հանդիպման հաշիվը 35-րդ րոպեին բացել է միլանյան թիմի հարձակվող Անժե-Յոան Բոննին: Երկրորդ խաղակեսի սկզբում՝ 47-րդ րոպեին, «Ինտերի» կիսապաշտպան Անդի Դիուֆը մեծացրել է իր թիմի առավելությունը։ 57-րդ րոպեին «Տորինոյի» հարձակվող Սանդրո Կուլենովիչը մեկ գնդակ ետ է բերել:

Տանտերերի մեկնարկային կազմում խաղադաշտ է դուրս եկել հայ կիսապաշտպան Հենրիխ Մխիթարյանը. նա փոխարինվել է 56-րդ րոպեին:

Այսպիսով, «Ինտերը» դուրս է եկել Իտալիայի գավաթի կիսաեզրափակիչ, որտեղ կմրցի «Ատալանտա»-«Յուվենտուս» զույգի հաղթողի հետ:

Իտալիայի գործող գավաթակիրը «Բոլոնիան» է, որը նախորդ խաղարկության եզրափակչում հաղթել է «Միլանին» (1:0):