Ուրարտուն բաց թողեց հաղթանակը Լոկոմոտիվի դեմ խաղում

ԱՄԷ-ում ուսումնամարզական հավաք անցկացնող «Ուրարտուն» ստուգողական խաղում ուժերը չափեց Մոսկվայի «Լոկոմոտիվի» հետ ու զիջեց 2։3 հաշվով։

Հանդիպման հաշիվը բացեց Նարեկ Աղասարյանը՝ 24-րդ րոպեին։ 58-րդ րոպեին Նիկիտո Սալտիկովը վերականգնեց հաշվի հավասարակշռությունը, սակայն 6 րոպե անց Նիկոլա Կալուկյանը կրկին առաջ մղեց «Ուրարտուին»։

87-րդ րոպեին Դանիլ Չևարդին հաշիվը դարձրեց 2։2, իսկ 2 րոպե անց Սալտիկովը դուբլ ձևակերպեց՝ հաղթանակ պարգևելով մոսկովյան ակումբին։

Հիշեցնենք, որ հավաքի առաջին խաղում «Ուրարտուն» 2։4 հաշվով զիջել էր Ուզբեկստանի ազգային հավաքականին։ Այդ խաղում թիմերն անցկացրել էին 3 խաղակես՝ յուրաքանչյուրը 35 րոպե տևողությամբ։ 2-րդ խաղում երևանյան ակումբը 1։1 հաշվով էր ավարտել հանդիպումը չինական «Ցինդաոյի» հետ։

Ռոբերտ Արզումանյանի գլխավորած թիմն ընկերական հանդիպումներ կանցկացնի նաև «Չժեցյանի», «Ելիմայի» և «Յունայթեդ Սպորտի» հետ։

«Ուրարտուի» հավաքը նախատեսված է մինչև փետրվարի 13-ը։