Մադրիդի «Ռեալը» և ՈՒԵՖԱ-ն հաշտվել են
«Ռեալը» պաշտոնական կայքում հայտնել է եվրոպական Սուպերլիգայի գործունեության հարցի շուրջ ՈՒԵՖԱ-ի հետ հաշտության մասին։ Մադրիդյան ակումբն ավելի վաղ ամենաակտիվն էր առաջ մղում այս մրցաշարի կազմակերպման անհրաժեշտության գաղափարը։
«ՈՒԵՖԱ-ն, եվրոպական ֆուտբոլային ակումբները և մադրիդյան «Ռեալը» համաձայնության են եկել՝ ի շահ եվրոպական ակումբային ֆուտբոլի։
Եվրոպական ֆուտբոլի շահերից բխող մի քանի ամիս տևած քննարկումներից հետո՝ ՈՒԵՖԱ-ն, Եվրոպական ֆուտբոլային ակումբների ասոցիացիան (EFC) և մադրիդյան «Ռեալը» հայտարարում են այնպիսի սկզբունքների շուրջ համաձայնության գալու մասին, որոնք նպաստելու են եվրոպական ակումբային ֆուտբոլի բարօրությանը՝ պահպանելով մարզական արժանիքների սկզբունքը, շեշտը դնելով ակումբների երկարաժամկետ կայունության և տեխնոլոգիաների կիրառման միջոցով երկրպագուների տպավորությունների բարելավման վրա։
Այս սկզբունքային համաձայնությունը նաև հիմք կծառայի եվրոպական Սուպերլիգայի հետ կապված իրավական վեճերի լուծման համար՝ այն բանից հետո, երբ այդ սկզբունքները կիրականացվեն և կներդրվեն», գրված է իսպանական ակումբի կայքում:
