Ձմեռային Օլիմպիական խաղեր. լեռնադահուկորդ Հարություն Հարությունյանը որակազրկվեց

Հայաստանի օլիմպիական հավաքականի անդամ, լեռնադահուկորդ Հարություն Հարությունյանը որակազրկվել է Իտալիայի Միլան և Կորտինա դ’Ամպեցո քաղաքներում ընթացող 25-րդ ձմեռային Օլիմպիական խաղերի ոլորավայրէջք մրցաձևում:

Ոլորավայրէջք մրցաձևի երկու մրցահերթի հանրագումարում 25-ամյա լեռնադահուկորդը ցույց է տվել 2:29.80 րոպե արդյունք և 96 մարզիկների շրջանում զբաղեցրել էր 38-րդ հորիզոնականը, սակայն ավելի ուշ Միջազգային Օլիմիական կոմիտեի կայքում Հարությունյանի գրանցած արդյունքը չեղարկվեց՝ որպես որակազրկում:



Նշենք՝ առաջին մրցահերթում 52 լեռնադահուկորդ, այդ թվում հսկա ոլորավայրէջք մրցաձևում Օլիմպիական չեմպիոնի կոչմանն արժանացած բրազիլացի Լուկաս Պինեյրոն, չեն կարողացել հատել եզրագիծը և դուրս են մնացել հետագա պայքարից: Հարությունյանն առաջին մրցահերթում 1:10.12 արդյունքով 37-րդն էր:  

Օրերս Հարությունյանը հսկա ոլորավայրէջք մրցաձևում ցույց էր տվել 1:21.67 րոպե արդյունք և 81 մասնակիցների շրջանում գրավել 59-րդ տեղը: Հարություն Հարությունյանը երկրորդ անգամ է մասնակցում ձմեռային Օլիմպիական խաղերին:

Այսօր երեկոյան գեղասահքի ազատ ծրագրում հանդես կգա Կարինա Ակոպովա-Նիկիտա Ռախմանին սպորտային զույգը: