CTA-ում վստահ են՝ մրցավարը պետք է ստուգեր Ժիրոնա – Բարսելոնա խաղի որոշիչ դրվագը

Մրցավարների տեխնիկական կոմիտեն (CTA) համարում, որ «Ժիրոնա» – «Բարսելոնա» խաղի (2:1) հաղթական գոլի դրվագում սխալ է եղել:

Լա Լիգայի 24-րդ տուրի հանդիպման 86-րդ րոպեին Ֆրան Բելտրանի խփած գոլից առաջ, «Ժիրոնայի» կիսապաշտպան Կլաուդիո Էչևերին, կանգնել է «բլաուգրանայի» պաշտպան Ժյուլ Կունդեի ոտքին: Ֆրանսիացին ընկել է, որից հետո Էչեվերին փոխանցում է կատարել Խոել Ռոկային, որը էլ դարձել է գոլային փոխանցման հեղինակ:

Դրվագը դիտարկվել է VAR-ի մրցավարների կողմից, սակայն գլխավոր մրցավար Սեսար Սոտո Գրադոյին չեն հրավիրել մոնիտորի մոտ: Գոլը գրանցվել է, և այն ի վերջո հաղթական է դարձել «Ժիրոնայի» համար:

Ինչպես հայտնում է Mundo Deportivo-ն, CTA-ում բոլորի համար ակնհայտ է, որ տեսակրկնապատկերի օգնականները պետք է միջամտեին և մրցավար Սոտո Գրադոյին առաջարկեին դիտել դրվագի կրկնապատկերը:

Այդ պարտությունից հետո «Բարսելոնան» կորցրեց Լա լիգայի առաջատարի դիրքը և այժմ 2 միավորով հետ է Մադրիդի «Ռեալից»: