Պետք է պայքարենք մինչև մրցավարի վերջին սուլիչը. Հովհաննես Համբարձումյանը՝ ԱԶ Ալկմարի դեմ պատասխան խաղի մասին
«Նոայի» ավագ և պաշտպան Հովհաննես Համբարձումյանը խոսել է Կոնֆերենցիաների լիգայի փլեյ-օֆֆ փուլի՝ «ԱԶ Ալկմարի» հետ առաջին խաղում խփած գոլի և տարած հաղթանակի մասին:
«Առաջնայինը կարևոր էր, որ հաշվի մեջ առաջ անցանք։ Զգացողությունները պարզապես ֆանտաստիկ էին․ բառերով դժվար է բացատրել։ Միգուցե տեսանյութը դիտեք՝ ավելի լավ կերևա։
Լավ խաղ անցկացրեցինք, խաղացինք շատ կարգապահ ֆուտբոլ։ Յուրաքանչյուր ֆուտբոլիստ կատարեց իր առջև դրված առաջադրանքը, և դրա շնորհիվ էլ վերջում արդյունքը մեզ համար դրական եղավ։ Պետք է նույն կերպ շարունակենք խաղալ։ Դիմակայությունը դեռ ավարտված չէ․ մեզ սպասվում է արտագնա, բարդ հանդիպում։ Պետք է լավ մարզվենք, գնանք այնտեղ բարձր տրամադրությամբ և պայքարենք մինչև մրցավարի վերջին սուլիչը։ Դրանից հետո արդեն կտեսնենք, թե ինչ կլինի։
Մրցակիցը գնդակով լավ ֆուտբոլ էր խաղում, արագ էին գործում, և նրանց դիմակայելը բարդ էր։ Նրանք ունեին բարձր անհատական որակներով ֆուտբոլիստներ։ Սակայն եվրոպական ֆուտբոլում, հատկապես փլեյօֆ փուլում, պետք է պատրաստ լինես նման խաղի, և իմ կարծիքով մենք կարողացանք անել ամեն ինչ՝ հաղթանակի հասնելու համար»,- ասել է Համբարձումյանը լրագրողների հետ զրույցում։
