Արբելոայի ապագան կախված է Բենֆիկայի հետ պատասխան հանդիպումից

Չեմպիոնների լիգայի անցումային փլեյ-օֆֆի պատասխան խաղում Մադրիդի «Ռեալը» կընդունի «Բենֆիկային»։

Այդ խաղը կարող է ճակատագրական լինել թիմի գլխավոր մարզիչ Ալվարո Արբելոայի համար, հաղորդում է Sport.es-ը։

Թիմերի միջև առաջին հանդիպումն ավարտվել էր «արքայական» ակումբի նվազագույն հաշվով հաղթանակով։

Աղբյուրի տեղեկություններով՝ 43-ամյա մարզչի պաշտոնավարումը վտանգի տակ է Լա Լիգայի 25-րդ տուրում «Օսասունայի» դեմ արտագնա խաղում կրած պարտությունից հետո (1:2)։ Չեմպիոնների լիգան լքելը կարող է հանգեցնել իսպանացի մասնագետի պաշտոնանկությանը։

Բացի այդ, հաղորդվում է, որ ակումբում չեն հասկանում Արբելոայի որոշումների տրամաբանությունը և դժգոհ են թիմի համար հստակ խաղային մոդելի բացակայությունից։ Ակումբի ղեկավարությունը դժգոհ է, որ գլխավոր մարզչի որոշ գործողություններ ավելի շատ ուղղված են ֆուտբոլիստներին հաճոյանալուն։

Արբելոան գլխավորել է «Ռեալը» հունվարին՝ Չաբի Ալոնսոյի հեռացումից հետո։ Նրա գլխավորությամբ թիմը անցկացրել է 10 հանդիպում, որոնցում գրանցել է յոթ հաղթանակ և կրել երեք պարտություն։