Լոֆտուս-Չիկը, ծնոտի վիրահատությունից հետո, սնվելու է զոնդի օգնությամբ

«Միլանի» կիսապաշտպան Ռուբեն Լոֆտուս-Չիկը կարող է բաց թողնել մրցաշրջանի մնացած հատվածը՝ «Պարմայի» դեմ խաղում ստացած վնասվածքի պատճառով։

Իտալիայի Ա Սերիայի 26-րդ տուրի հանդիպման 8-րդ րոպեին (0:1) Լոֆտուս-Չիկը բախվել էր «Պարմայի» դարպասապահ Էդոարդո Կորվիի հետ այն պահին, երբ վերջինս բռունցքով հեռացնում էր գնդակը՝ Ալեքսիս Սալեմակերսի փոխանցումից հետո։ Անգլիացի ֆուտբոլիստը բախումից հետո ընկել է խոտածածկին և խաղադաշտը լքել պատգարակով։

Ավելի ուշ պարզ է դարձել, որ Լոֆտուս-Չիկի մոտ ախտորոշվել է ծնոտի կոտրվածք։ Նախնական զննությունը ցույց է տվել նաև առնվազն երկու վերին ատամի կոտրվածք, ինչպես նաև երկու պատռվածք, որոնցից մեկը՝ ճակատին։ Միաժամանակ նշվում է, որ ֆուտբոլիստը գիտակցությունը չի կորցրել, իսկ ուղեղի ցնցում չի արձանագրվել։

Հաղորդվում է, որ կիսապաշտպանն այսօր կենթարկվի դիմածնոտային վիրահատության։ Որոշ ժամանակ ֆուտբոլիստը, հավանաբար, կսնվի զոնդի միջոցով։