Ռեալում չափազանց շատ են գերագնահատված ֆուտբոլիստները. Դյուգարիի կտրուկ կարծիքը
Ֆրանսիայի հավաքականի կազմում աշխարհի ու Եվրոպայի չեմպիոն Քրիստոֆ Դյուգարին քննադատել է Մադրիդի «Ռեալի» ներկայիս կազմի խաղացողներին և պաշտպանել Կիլիան Մբապեին:
«Ինձ զարմացնում է, որ «Ռեալի» խնդիրները կապում են բացառապես Մբապեի հետ: Պետք է դադարեցնել չափազանցնելը: Եթե իսպանացիներին նա այլևս պետք չէ, ապա թող Կիլիանին հետ վերադարձնեն: Կամ գուցե նա հեռանա և երջանկացնի մեկ ուրիշին, չգիտեմ: Բայց անկեղծ ասած՝ այդ իրավիճակն ինձ ապշեցնում է:
Կարծում եմ՝ այս «Ռեալում» չափազանց շատ են խաղացողներ, ովքեր «Մադրիդի» մակարդակի չեն: Նրանք գերագնահատված են: Խոսքս Էդուարդո Կամավինգայի, Արդա Գյուլերի, Ֆեդերիկո Վալվերդեի և Օրելյեն Չուամենիի մասին է, որոնք արդեն բավական ժամանակ է՝ թիմում են:
Ռաուլ Ասենսիոն, որը հանկարծ հայտնվեց և հիմնական կազմի խաղացող դարձավ բազմաթիվ վնասվածքների պատճառով, թեև իրեն լավ դրսևորեց, բայց դարձյալ «Ռեալի» կենտրոնական պաշտպանի մակարդակի չէ:
Դավիդ Ալաբան վնասվածք ունի և երեք ամսվա մեջ խաղում է ընդամենը մեկ շաբաթ. նա ևս չի համապատասխանում ակումբի մակարդակին»,- ֆրանսիացու խոսքն է մեջբերում RMC Sport-ը:
