Թուրքիայում դարպասապահը գնդակով հարվածել է ճային ու թռչնին տապալել խոտածածկին (տեսանյութ)

Թուրքական ֆուտբոլում, որն այս օրերին ցնցվում է պայմանավորված խաղերի և ապօրինի խաղադրույքների սկանդալներից, տեղի է ունեցել մի դեպք, որը ստիպել է երկրպագուներին մի պահ մոռանալ կոռուպցիայի մասին:

Ստամբուլի սիրողական լիգայի փլեյ-օֆֆի եզրափակիչ «Մևլանաքափը Գյուզելհիսար»-«Իստամբուլ Յուրդում Սփոր» հանդիպման 22-րդ րոպեին «Յուրդում Սփորի» դարպասապահ Մուհամմեդ Ույանըքը ուժեղ հարվածով գնդակը հեռացրել է սեփական տուգանային հրապարակից։ Գնդակը օդում դիպել է ճային: Հարվածը եղել է այնքան ուժգին, որ թռչունը անկենդան ընկել է խոտածածկին։ Տեսանյութը՝ այստեղ։

Թիմի ավագ Գանի Չաթանը վազել է թռչնի մոտ: Չսպասելով բժիշկներին՝ ֆուտբոլիստը սկսել է մատներով սրտի անուղղակի մերսում և արհեստական շնչառություն կիրառել։

Մի քանի վայրկյան անց ճայը սկսել է շարժվել և շնչել: Ֆուտբոլիստի արագ կողմնորոշման շնորհիվ թռչունը փրկվել է:

Հիշեցնենք, որ անցած շաբաթ Ստամբուլի դատախազությունը ձերբակալել էր 32 անձի, այդ թվում՝ ակումբների ղեկավարների, ովքեր կասկածվում են սեփական թիմերի պարտության վրա խաղադրույքներ կատարելու մեջ: